ანი სუბარი არის ფსიქოლოგი და არტთერაპევტი. მისი პროფესიული საქმიანობა მოიცავს ფსიქოლოგიურ კონსულტირებასა და ხელოვნებითი თერაპიის გამოყენებას ფსიქოემოციური მხარდაჭერის პროცესში. მას მრავალწლიანი გამოცდილება აქვს როგორც ბავშვებთან და მოზარდებთან, ასევე ზრდასრულებთან მუშაობის მიმართულებით.

ანიმ ბაკალავრის ხარისხი მიიღო ივანე ჯავახიშვილის სახელობის თბილისის სახელმწიფო უნივერსიტეტში, ხოლო მაგისტრის ხარისხები — ფსიქოდიაგნოსტიკისა და კონსულტირების მიმართულებით წმ. ანდრია პირველწოდებულის სახელობის ქართულ უნივერსიტეტში და კლინიკური არტთერაპიის მიმართულებით კავკასიის უნივერსიტეტში.

ამჟამად მუშაობს კარავში არტთერაპევტის პოზიციაზე. იგი ასევე არის ფსიქოლოგი ფსიქო-სოციალური რეაბილიტაციის ცენტრში „კამარა“ და წლების განმავლობაში მუშაობდა თბილისის მუნიციპალურ თავშესაფრებში, სადაც ახორციელებდა ბენეფიციართა ფსიქოლოგიურ შეფასებას, ინდივიდუალურ და ჯგუფურ კონსულტირებას, ასევე ფსიქოსაგანმანათლებლო ინტერვენციებს ბავშვებთან, მოზარდებთან და მათ ოჯახებთან.

ანი სუბარს  გავლილი აქვს არაერთი სპეციალიზებული კურსი და ტრენინგი, მათ შორის არტთერაპიის მრავალმოდულიანი პროგრამა, ფსიქოსოციალური კრიზისების მართვის სტრატეგიები, ნეირო-ლინგვისტური პროგრამირება (NLP), სიმბოლდრამა და ზღაპარ-თერაპია. ასევე მონაწილეობა აქვს მიღებული საერთაშორისო დონის სემინარებში, მათ შორის ოტო კერნბერგის ტრენინგში, რომელიც ეძღვნებოდა ურთიერთობების ფსიქოლოგიას.

მისი პროფესიული ინტერესებია არტთერაპია, ფსიქოემოციური კეთილდღეობა, კრიზისული ინტერვენცია და ინდივიდუალურად მორგებული ფსიქოლოგიური მხარდაჭერა.